உலக மக்கள் தொகை தினம்

உலக மக்கள் தொகை தினம்

குபு குபு குபு குபுவென போகும்

மக்கள் தொகையின் வேகம்

விறு விறு விறுவென ஏறும்

தலைகளின் எண் நாள் தோறும்

சாலையெங்கும் மக்கள் கூட்டம்

புவியெங்கும் மனிதனின் ஆட்டம்

சிக்கித் திணறுது பூமி – இதை

யார் வந்து காப்பது சாமி

மண்ணை நிறைக்கும் கூட்டம்

கடல் அலைகள் கூட வெட்கும்

தின்றே அழிக்கும் கூட்டம் – இயற்கையை

கொன்றே புவியில் வாழும்

மண்ணை கொன்றே சோறாக்கும்

காற்றை கொன்றே நஞ்சாக்கும்

இது எத்தனை தூரம் போகும்

புவி புழுக்கத்தில் வெந்தே நோகும்

சிக்கித் திணறுது பூமி – இதை

யார் வந்து காப்பது சாமி

உடல்களின் கணக்கு கூடுகையில்

உயிருக்கு பிணக்கு வருகிறதே

கூட்டம் சேர்த்தது போதுமய்யா –இது

புவியை காக்கும் நேரமய்யா

உறவை எண்ணி வாழ்கையிலே

புது உயிர்கள் புவியை நிறைக்கிறதே

உறவாய் எண்ணி வாழ்கையிலே

மனிதம் புவியில் மலர்கிறதே

உடல்களின் கணக்கை குறைப்போமே

உணர்வுகளால், உரிமைகளால், உறவுகளால்

புவியை நல் குணத்தால் நிறைப்போமே.   – ரெ.ஐயப்பன்